დღეს, თურქეთის ქალაქ ერზრუმიდან საქართველოს მიმართულებით პირველი სატვირთო მატარებელი დაიძრა. რამდენიმე ათასი ტონა თურქული ტვირთის საქართველოში იმპორტი  ბაქო-თბილისი-ყარსის სარკინიგზო მონაკვეთით განხორციელდება და სარკინიგზო გადაზიდვების მოცულობა ეტაპობრივად მოიმატებს.

ცერემონიაში მონაწილეობდნენ „საქართველოს რკინიგზის“  გენერალური დირექტორი დავით ფერაძე და  თურქეთის სახელმწიფო რკინიგზის  (TCDD)  გენერალური დირექტორი უიგუნ ალი ისხანი.

„საქართველო-თურქეთის რკინიგზების ისტორიაში უმნიშვნელოვანესი თარიღია, რადგანაც დღეს პირველად ხდება რკინიგზის მეშვეობით თურქული ტვირთის  საქართველოში იმპორტი. ეს ისტორიული მნიშვნელობის მოვლენა ბაქო-თბილისი-ყარსის სარკინიგზო ხაზის გამოყენებით განხორციელდება და იმედს გამოვთქვამთ, რომ ტვირთბრუნვა ეტაპობრივად მოიმატებს. მსურს განსაკუთრებული მადლობა გადავუხადო საქართველოს ეკონომიკისა და მდგრადი განვითარების მინისტრს ქალბატონ ნათია თურნავას და თურქეთის ტრანსპორტისა და ინფრასტრუქტურის მინისტრს, ბატონ მეჰმეთ ჯაჰით თურანს  პროექტის მხარდაჭერისთვის,”- განაცხადა სს „საქართველოს რკინიგზის“ გენერალურმა დირექტორმა დავით ფერაძემ.